سبتمبر 26, 2016

مارينا سمير

“لكل واحدة حرب بتخوضها بطريقة .. ولكل واحدة حياة محدودة بالضيقة”.

تحضير .. خطة .. جدول .. لخبطة .. هانسمع اللي عايزينه؟ .. “مش مساحتنا، دي مساحتهن” ستات .. صعيد .. حب .. حرب .. جواز .. غصب .. موت .. طلاق.. عيال .. نزاع .. ورث .. رضا .. مقاومة.. أبو غرير .. منيا.

“حطيتوا ابو غرير على الخريطة” .. “أنا ماعرفش انا عندي كام سنة دلوقت” .. “ذاكرت وخدت دروس عشان أدخل ثانوي بس للأسف .. جيبت المجموع والجماعة مارضيوش ادخل ثانوي عشان مفيش مدرسة في القرية وعشان اروح المدرسة هارجع بالليل متأخر .. وقالولي الثانوي مش للبنات”.. “مابتعرفش تتحمل مسئولية” .. “انا بقيت باحب الموت جداً” .. “لامايلغيش شخصيتي” .. “كلام الناس مابيسيبش الست  في حالها” .. “هما دايماً فاكرين ان لو حصل طلاق تبقى الست هي السبب، وانا مش ملزمة أحكي واعرف كل الناس مين السبب” .. “احكي يا نورا عادي ما البلد كلها عارفة الحكاية” .. “ماتفتحوا خيالكوا” .. “غنوا واحنا هانرد وراكوا” .. ضحك .. رقص .. “مفيش مستشفى في البلد، حملت وسقطت وكنت هاموت من النزيف ومكنش فيه دكتور، بس ربنا ستر!”  .. “دلوقتي بيقولولي انتي اللي ضيعتي ورث بنتك لما سيبتي بيت جوزك، مانتوا اللي ضغطوا عليا وخليتوني ارجع على بيت ابويا” .. “عايشة مع اخويا دلوقتي، بيشتغل في المحاجر، ودي شغلانة خطرة قوي” .. “اتصدمت فيه صدمة كبيرة قوي قوي” .. “انا اللي كنت باطلب الطلاق في اليوم مليون مرة مش مية مرة” .. “اتجوزت وانا عندي 13 سنة وهو مات وانا عندي 19، جيبت منه وردة وهي معاها دلوقتي يوستينا”  .. “القاعدة في ريحك حلوة” .. “عيشت لوحدي وقولتلهم أنا لا هابقى خدامة لراجل ولا لست” .. شخبطة .. ألوان .. ضحك وتصوير .. وداع.

تحضير للعرض

الوقت ضيق.. عرض شارع .. هانلحق؟ .. سلام .. شادي .. ندى .. “معاكوا نص ساعة تكتبوا عرض” .. ورقة وقلم .. 4 مراحل .. خطة تاني .. أغنية .. وحشة .. “احنا بنتكلم على لسان الناس؟” .. “أنا هنا ليه؟” .. “مش دة اللي نقصده” .. “افتحوا قلبكوا” .. “انتوا فين من الحكايات دي؟” .. “showing is better than telling” .. احباط .. توتر .. الوقت ضيق .. هانلحق؟ .. نوم.

يوم جديد .. عرض بنات البرشا .. جواز .. إلهام .. من الأول ..”انسوا اللي كتبتوه” .. معاكوا نص ساعة تكتبوا عرض .. “طب خليها ساعة” .. كل واحدة لوحدها .. ورقة وقلم تاني .. كتبنا .. كويس؟ مش عارفة؟ .. “معاكوا ساعة وربع تكتبوا من غير ما توقفوا، أى فكرة تيجي في دماغكوا” .. كتابة .. عياط .. دبان كتير .. وكتابة وكتابة وكتابة .. اسراء وميام .. كاميرا .. 6 جمل .. أغنية .. طب والعرض؟ .. الوقت ضيق! .. “هانعمل عرض ارتجال” ..  “يعني ايه عرض ارتجال، لأ مستحيل مش موافقة، مش هانعمله” .. مناقشة .. “طب نجرب” .. “انا واثقة فيكوا، بس عارفة ان أنا مش هاعرف أعمل دة” .. نهى .. “قرب قرب قرب، 3 بنات من مصر” .. جمعية الصعيد .. أطفال كتير .. ارتجال .. غنا .. حكي.. تشجيع .. خلصنا .. لعب .. أطفال .. كورة طايرة .. لعبة المية .. كله بيرش على بعضه .. اهربوااا .. طينة ومية وضحك .. “برافو عليكوا يا بنات” .. “بس أنا مش راضية” .. بكرة هانتكلم أكتر .. فاضل يوم .. هانلحق؟ .. نوم.

يوم جديد .. سلام .. انسوا القافية .. ورقة وقلم .. كل واحدة لوحدها .. كتابة .. “ازاى هاندخل الحاجات دي في بعض؟” .. دة هايبقى القرار .. هانبتدي بدة .. طب ايه قبل ايه؟ .. مفجأة .. ناصرة وشيرين وسعاد .. أحضان .. وحشوني .. الفساتين .. تصوير .. والعرض؟ .. مراجيح وضحك .. غدا .. الساعة 5 .. العرض بكرة! .. عودة .. العرض خلص .. هانحفظ؟ .. لأ، الأول تمارين مسرح .. فيه فرح! .. هانحفظ ازاى في الدوشة دي .. تمارين مسرح .. حفظ .. الساعة 10 .. هانتعشى؟ .. “لسة ماعملناش ولا بروفة” .. العرض الساعة 11 الصبح ! .. عشا .. بروفة .. حلو؟؟ .. حلو ! .. الدُف .. الأوضة .. اسراء وميام وندى ودينا .. كلام .. مناقشة .. مشاعر .. عياط .. توتر .. إنجاز .. خوف .. حماس .. هانصحى بدري .. نوم.

يوم العرض

صحينا متأخر.. فين سلام؟ .. فطار .. لموا الشنط .. والبروفة؟ .. بروفة .. بنات البرشا .. بروفة في الأوضة .. سلام جه .. والدُف .. حافظين؟ .. حافظين ..

بروفة قدام بنات البرشا .. “هاتخلوني أعيط” .. “قولتوا حاجات لمست معايا” .. هانتحرك .. منهري .. ستات ابو غرير مستنيينا .. أحضان .. سقف وطبل ورقص .. “هانفرجكوا قبل مانطلع” .. العرض .. عيون بتهرب .. ابتسامات .. صمت .. تركيز .. “عبرتوا عن كل واحدة فينا” .. هانطلع .. الشارع .. شمس .. حر .. مسيرة … أطفال .. أغاني .. زغاريط .. مين دول؟ .. عرض بنات البرشا .. عرض ولاد ملوي .. بنت المصاروة .. دوشة .. شمس .. تكاتك .. مية في الأرض .. هانبتدي؟ .. صوت جوايا “ايه أعلى صوت عندي؟، مش هاعرفه غير لما اتكلم!” .. ابتدينا .. تركيز .. حركة .. مفيش توتر .. حكايات .. رقص .. أغاني .. حاسة اني طايرة .. مبسوطة .. مستمتعة .. قاعدة الفلاحة؟ .. هانكمل .. مهرجان .. خلصنا؟ .. خلصنا!

مسيرة رجوع .. الجمعية .. صور الستات .. ضحكات .. وداع أخير .. دموع .. “ماتنسوناش”.

هاننزل الشنط .. ركبنا العربية .. ومشينا.

أنا عايزة أرجع.

مارينا سمير

بنت المصاروة

ابو قرقاص / اغسطس